Fjárhagur

Rekstrarreikningur

Samstæðureikningur Norðurorku hf. samanstendur af ársreikningi móðurfélagsins Norðurorku hf. og dótturfélagsins Fallorku ehf., sem er að fullu í eigu Norðurorku hf.

Rekstur samstæðunnar gekk vel á árinu 2025 og er umfang starfseminnar að aukast jafnt og þétt.

Reikningsskilaaðferðum félagsins var breytt á árinu 2023 og fallið frá endurmatsaðferð sem notuð hafði verið frá árinu 2008. Helstu áhrif breytingarinnar í rekstrarreikningi voru að afskriftir lækkuðu og afkoma hækkaði. Í efnahagsreikningi lækkuðu bæði varanlegir rekstrarfjármunir og eigið fé, sem og eiginfjárhlutfall. Rétt er að hafa breyttar reikningsskilaaðferðir í huga við samanburð fjárhagsupplýsinga í þeim myndum og töflum sem birtar eru í ársskýrslu.

Rekstrartekjur samstæðunnar námu 5.981 milljón króna og hækkuðu um 3,5% milli ára. Hækkun tekna er eingöngu vegna gjaldskrárhækkana því ekki var um magnaukningu að ræða í sölu á heitu vatni og rafmagni. Rekstrargjöld, þ.m.t. afskriftir, hækka um 9% milli ára og námu 4.771 milljón króna. Hækkun rekstrargjalda má að mestu rekja til hærri afskrifta, en þar var sérstök gjaldfærsla að fjárhæð 275 milljónir króna vegna borholu í Ólafsfirði sem ekki skilaði árangri. Fjármagnsliðir lækka verulega frá fyrra ári vegna söluhagnaðar eignarhluta, en fjármagnsliðir samtals, án söluhagnaðar, eru nánast óbreyttir frá fyrra ári.

Rekstrarhagnaður fyrir afskriftir, fjármagnsliði og skatta (EBITDA) nam 2.340 milljónum króna eða 39% af veltu samanborið við 2.198 milljónir króna árið áður.

Hagnaður samstæðunnar samkvæmt rekstrarreikningi nam 887 milljónum króna á árinu 2025 samanborið við 782 milljónir króna árið á undan.

EBITDA stendur fyrir framlegð reksturs án fjármagnsliða, afskrifta og skatta.
EBITDA framlegð er hlutdeild EBITDA af heildartekjum.

Ársreikningur samstæðu Norðurorku 2025

Efnahagur

Heildareignir Norðurorku námu 21.451 milljón króna í árslok 2025 og heildarskuldir 9.711 milljónum króna. Í lok árs nam handbært fé 348 milljónum króna og veltufjárhlutfall var 1,18. Eigið fé var 11.740 milljónir króna og eiginfjárhlutfall í árslok 54,7%.

Fjárfesting samstæðunnar í varanlegum rekstrarfjármunum á árinu 2025 nam 2.015 milljónum króna, en verulegar fjárfestingar hafa verið á undanförnum árum í veitukerfum félagsins, endurnýjun kerfa, lagnir í ný hverfi og orkuöflun.

Hjá samstæðunni voru tekin ný langtímalán að fjárhæð 300 milljónir króna á árinu 2025, vegna vatnsöflunar hitaveitu.

Arðsemi eigin fjár fyrir árið 2025 var 7,9% samanborið við 7,5% árið 2024.

Ekki var greiddur arður á árinu 2025, en það var ákvörðun stjórnar að greiða ekki arð meðan félagið stendur frammi fyrir stórum fjárfestingum og lántökum til að fjármagna þær.

Ársreikningur samstæðu Norðurorku 2025

Sjóðstreymi

Sjóðstreymisyfirlit sýnir raunverulegt peningastreymi rekstrarins.

Veltufé frá rekstri nam 2.065 milljónum króna á árinu 2025, sem er 11% hækkun frá fyrra ári. Miklar fjárfestingar einkenna sjóðstreymið, en einnig hefur söluverð eignarhluta í félögum ásamt nýjum langtímakröfum, veruleg áhrif á fjárfestingahreyfingar. Handbært fé í upphafi árs 2025 var 232 milljónir króna en var 348 milljónir króna í lok árs. 

Dökkbláu liðirnir sýna innstreymi fjármagns og ljósbláu liðirnir útstreymi fjármagns.

Ársreikningur samstæðu Norðurorku 2025

Lykiltölur 

Lykiltölur samstæðu

Horfur í rekstri

Áætlanir samstæðunnar fyrir árið 2026 gera ráð fyrir að rekstrarafkoma verði  jákvæð um 980 milljónir króna hjá móðurfélaginu og 116 milljónir króna hjá dótturfélaginu, fyrir tekjuskatt og áhrif hlutdeildarfélaga. Heildaráætlun samstæðunnar gerir ráð fyrir 958 milljón króna hagnaði. Í tekjuáætlun er byggt á væntum magnbreytingum miðað við reynslu síðustu ára og hækkun gjaldskráa á bilinu 0-5%. Meiri hækkun er áætluð hjá fráveitu, eða 14,5%, þar sem rekstur hennar er þungur.

Kostnaðaráætlun er almennt byggð á raunkostnaði félagsins að teknu tilliti til þekktra ytri forsenda svo sem verðbólguþróunar og vaxtastigs. Í rafveitu er byggt á raunkostnaði, að teknu tilliti til þeirra viðmiða sem ákvörðun tekjumarka dreifiveitna felur í sér.

Áætlanir samstæðunnar vegna framkvæmda á árinu 2026 eru 1.909 milljónir króna og eru rúmlega 50% þeirra áætlaðar í verkefni hitaveitu, sem eru helst orkuöflun og snjallmælavæðing. Töluverðar framkvæmdir eru fyrirhugaðar í gatnagerð þá bæði tengt nýframkvæmdum og endurbótum og á það við um öll veitukerfi. Þá er einnig unnið að endurnýjun upplýsingakerfa félagsins. Útlit er fyrir verulegan þunga í fjárfestingum næstu árin og nemur framkvæmdaáætlun áranna 2026-2031, samtals 8.745 milljónum króna. Hitaveitan vegur þar þyngst vegna jarðhitaleitar og virkjunarframkvæmda. Félagið hefur á undanförnum árum notað margfaldan hagnað sinn til fjárfestinga og er útlit fyrir að svo verði áfram. Það er því afar mikilvægt fyrir félagið að hafa gott veltufé frá rekstri.