Metanframleiðsla

Norðurorka hóf framleiðslu metangass úr gömlu ruslahaugunum í Glerárdal fyrir ofan Akureyri í ágústlok árið 2014. Til að byrja með var salan nokkuð í takt við væntingar en vöxturinn hefur verið minni en áætlað var í upphafi. Salan á árinu 2023 var 225.497 Nm³og minnkaði um 9% frá árinu á undan.

Á árinu 2023 var flutt gas frá Sorpu í Álfsnesi til Akureyrar og létti það nokkuð á framleiðslunni frá Glerárdal sem ekki annar lengur eftirspurn á álagstímum. Fluttir voru um 20.000 Nm³ til Akureyrar á árinu 2023.

Ljóst er að framleðslugeta haugsins hefur náð hámarki og kemur til með að minnka jafnt og þétt næstu ár. Hlutverk Norðurorku er að safna því metani sem myndast á gömlu ruslahaugunum í Glerárdal og vinna úr því eldsneyti. Það er verkefni samfélagsins að finna lausnir til frekari framleiðslu á metangasi og hefur Norðurorka bent á mikilvægi þess að hefja þá vinnu.

Hámarksframleiðslugeta haugsins í Glerárdal er talsvert minni en ráðgert var í upphafi verkefnisins. Nú þegar við stöndum frammi fyrir þessari áskorun er gott að rifja upp að frá upphafi hefur Norðurorka safnað, hreinsað og þjappað rúmlega 1,6 milljón Nm³ af metangasi. Þetta hefur sparað innflutning jafn margra lítra af jarðefnaeldsneyti og sparað losun á því sem nemur u.þ.b. 28 þúsund tonnum af koltvísýringi. Verkefnið hefur því sannarlega skilað samfélaginu ávinningi sem við getum verið stolt af.

Til baka - Yfirlit yfir starfsemina