Fjárhagur

Rekstrarreikningur

Rekstur samstæðunnar gekk vel á árinu 2023, þrátt fyrir krefjandi aðstæður í efnahagsumhverfi, hátt vaxtastig og verðbólgu umfram væntingar.

Reikningsskilaaðferðum félagsins var breytt á árinu 2023 og fallið frá endurmatsaðferð sem notuð hefur verið frá árinu 2008. Helstu áhrif breytingarinnar í rekstrarreikningi eru að afskriftir lækka og afkoma hækkar. Í efnahagsreikningi lækka bæði varanlegir rekstrarfjármunir og eigið fé og eiginfjárhlutfall lækkar. Rétt er að hafa breyttar reikningsskilaaðferðir í huga við samanburð fjárhæða fyrri ára við árið 2023.

Rekstrartekjur samstæðunnar námu 5.025 milljónum króna og hækkuðu um 11% milli ára. Rekstrargjöld hækka um 7% milli ára og námu 3.681 milljón króna. Fjármagnsliðir lækka frá fyrra ári vegna hagstæðs gengismunar.

Rekstrarhagnaður fyrir afskriftir, fjármagnsliði og skatta (EBITDA) nam 2.136 milljónum króna eða 42,5% af veltu samanborið við 1.684 milljónir króna árið áður.

Hagnaður samstæðunnar samkvæmt rekstrarreikningi nam 629 milljónum króna á árinu 2023 samanborið við 391 milljón króna árið á undan, eftir að leiðrétt hefur verið fyrir breytingu reikningsskilaaðferðar.

EBITDA stendur fyrir framlegð reksturs án fjármagnsliða, afskrifta og skatta.
EBITDA framlegð er hlutdeild EBITDA af heildartekjum.

Ársreikningur samstæðu Norðurorku 2023

Efnahagur

Heildareignir Norðurorku námu 19.100 milljónum króna í árslok 2023 og heildarskuldir 9.027 milljónum króna. Í lok árs nam handbært fé 73 milljónum króna en handbært fé frá rekstri nam 1.746 milljónum króna. Eigið fé var 10.073 milljónir króna og eiginfjárhlutfall í árslok 52,7%.

Fjárfesting samstæðunnar í varanlegum rekstrarfjármunum á árinu 2023 nam 2.103 milljónum króna, en verulegar fjárfestingar hafa verið á undanförnum árum í veitukerfum félagsins.

Hjá samstæðunni voru tekin ný langtímalán að fjárhæð 800 milljónir króna á árinu 2023, vegna hitaveituframkvæmda. Um er að ræða „græna“ fjármögnun en það eru lán sem Lánasjóður íslenskra sveitarfélaga veitir til umhverfisvænna verkefna, þ.m.t. jarðvarmavirkjana.

Arðsemi eigin fjár fyrir árið 2023 var 5,5% samanborið við 4,0% árið 2022.

Greiddur arður á árinu 2023 vegna afkomu ársins 2022 var 127 milljónir króna.

Ársreikningur samstæðu Norðurorku 2023

Sjóðstreymi

Sjóðstreymisyfirlit gefur glögga mynd af raunverulegu peningastreymi rekstrarins.

Veltufé frá rekstri nam 1.862 milljónum króna á árinu 2023 og hækkaði um 367 milljónir króna milli ára. Miklar fjárfestingar einkenna sjóðstreymið og valda þær verulegri lækkun á handbæru fé. Handbært fé í upphafi árs 2023 var 235 milljónir króna en var 73 milljónir króna í lok árs. 

Dökkbláu liðirnir sýna innstreymi fjármagns og ljósbláu liðirnir útstreymi fjármagns.

Ársreikningur samstæðu Norðurorku 2023

Lykiltölur 

Lykiltölur (fjárhæðir í milljónum króna)

Horfur í rekstri

Áætlanir samstæðunnar fyrir árið 2024 gera ráð fyrir að rekstrarafkoma verði 636 milljónir króna hjá móðurfélaginu en 43 milljóna króna tap hjá dótturfélaginu, fyrir tekjuskatt og áhrif hlutdeildarfélaga. Í tekjuáætlun er byggt á væntum magnbreytingum miðað við reynslu síðustu ára og hækkun gjaldskráa á bilinu 6,6-12%.

Kostnaðaráætlun er almennt byggð á raunkostnaði félagsins að teknu tilliti til þekktra ytri forsenda svo sem verðbólguþróunar og vaxtastigs. Í rafveitu er byggt á raunkostnaði, að teknu tilliti til þeirra viðmiða sem ákvörðun tekjumarka dreifiveitna felur í sér.

Áætlanir samstæðunnar vegna framkvæmda á árinu 2024 eru 1.901 milljónir króna og er um helmingur þess áætlaður í verkefni hitaveitu, sem eru helst orkuöflun og snjallmælavæðing. Einnig er gert ráð fyrir töluverðum framkvæmdum við spennubreytingar í dreifikerfi rafmagns ásamt því sem unnið er að endurnýjun á upplýsingakerfum félagsins. Töluverðar framkvæmdir eru einnig fyrirhugaðar í gatnagerð þá bæði tengt nýframkvæmdum og endurbótum og á það við um öll veitukerfi. Útlit er fyrir verulegan þunga í fjárfestingum næstu árin og nemur framkvæmdaáætlun áranna 2024-2028, samtals 6.846 milljónum króna. Hitaveitan vegur þar þyngst vegna jarðhitaleitar og virkjunarframkvæmda.